Бошланғич синф ўқитувчиларига миллий сертификат бериш тартиби тасдиқланди

Ўзбекистонда бошланғич таълим ўқитувчиларига миллий сертификат бериш бўйича малака имтиҳонларини ўтказиш тартиби тасдиқланди. Бу Ҳукуматнинг 29 июлдаги қарори билан белгиланди.

Қарорга кўра, 2026/2027-ўқув йилидан бошлаб B+ ва ундан юқори даражадаги миллий сертификатга эга ҳамда бошланғич синфларда дарс берувчи ўқитувчиларга сертификат амал қилган давр мобайнида давлат бюджети ҳисобидан лавозим маошига ҳар ой 15 фоиз устама тўланади.

Низомга мувофиқ, малака имтиҳонларини Билим ва малакаларни баҳолаш агентлиги ташкил этади. Имтиҳонда қатнашиш учун талабгор my.gov.uz портали орқали рўйхатдан ўтади ва БҲМнинг 1,5 баравари миқдорида тўлов амалга оширади.

Натижалар халқаро Раш модели асосида баҳоланади. Баллар қуйидагича даражаларга ажратилади:

70 баллдан юқори — А+

65–69,9 балл — А

60–64,9 балл — B+

55–59,9 балл — Б

50–54,9 балл — C+

46–49,9 балл — C

Имтиҳонда талабгорларнинг фан бўйича билимлари, ўқитиш методикаси ва педагогик маҳорати тест синовлари орқали баҳоланади.

Малака имтиҳонидан муваффақиятли ўтганларга 1 иш куни ичида QR кодли электрон сертификат my.gov.uz портали орқали юборилади. Натижалардан норози бўлган талабгорлар эса улар эълон қилинган кундан бошлаб 3 кун ичида портал орқали апелляция шикояти беришлари мумкин.

Шунингдек, аввалроқ мактабларда дарс соатларини тақсимлаш тартиби ҳам ўзгартирилгани, эндиликда устуворлик ўқитувчининг касбий салоҳияти, фаолият натижалари ҳамда миллий ва халқаро сертификатларига қаратилиши маълум қилинган.