Тошкентда 86 ёшли аёлнинг уйига қамаб кетилгани юзасидан жиноят иши қўзғатилди

Тошкент шаҳрида 86 ёшли аёл уйига қамаб, қаровсиз қолдирилгани ҳақидаги хабарлар юзасидан Жиноят кодексининг 168-моддаси 4-қисми “а” банди (фирибгарлик) билан жиноят иши қўзғатилди. Бу ҳақда Бош прокуратура маълум қилди.

Ижтимоий тармоқларда тарқалган видеоларга кўра, кекса аёл икки ҳафта давомида уйда ёлғиз, оч ва сувсиз қолган. Уйнинг эшиги қулфланган бўлиб, кўнгилли фуқаро томонидан очилган ва аёлга зарур ёрдам кўрсатилган. Қаровчи эса бир кун аввал келиб, уни овқатлантириб кетганини билдирган.

Бош прокуратура маълумотига кўра, ҳолат Мирзо Улуғбек тумани прокуратураси томонидан ўрганилган. Аниқланишича, 1940 йилда туғилган Л. Журавлёва Мирзо Улуғбек туманидаги хонадонда ёлғиз яшаб келган ҳамда соғлиғи билан боғлиқ бир қатор касалликлар сабабли диспансер ҳисобида турган.

Шунингдек, аёлга тегишли хонадон 2025 йил 25 сентябрь куни нотариал тартибда олди-сотди шартномаси асосида бошқа шахс номига расмийлаштирилгани аниқланган.

Текширув давомида уй-жойни бегоналаштириш вақтида фуқаронинг ўз ҳаракатларининг мазмунини англаш ва уларни бошқариш қобилияти, шунингдек, фирибгарлик қурбони бўлган-бўлмагани ўрганилмоқда.

Мазкур ҳолат юзасидан тергов ҳаракатлари давом этмоқда.