Лондонда яшовчи мебел реставратори Бен Бекон муҳим кашфиётни амалга оширди. Бу эса музлик даври овчи-йиғувчи қоятош санъатини яхшироқ тушунишга олиб келди. Унинг фикрича, чизмалардаги махсус белгилар ўша давр одамларига ой тақвими ҳисобини юритишга ёрдам берган.

Ҳозирга қадар бутун Европа ғорларида буғу, балиқ ва қорамол каби ҳайвонларнинг қоятош расмлари топилган. Бироқ, археологлар узоқ вақт давомида ушбу тасвирлардаги алоҳида нуқталар ҳамда бошқа белгиларнинг маъносини тушуна олмадилар.

Бен Бекон аксарият вақтларини Интернетда ва Британия кутубхонасида ўтказди ҳамда қоятош расмлари сирини очиш учун ҳаракат қилди. У иложи борича кўпроқ маълумот тўплашга ҳаракат қилди ва такрорланадиган нақшларни қидира бошлади.

Хусусан, Бекон баъзи тасвирлардаги “туғилиш” белгиси бўлиши мумкинлигини тахмин қилиб, “Й” символини кўриб чиқди, чунки рамзларнинг бир чизиқдан иккинчи чизиққа ўсиб бориши унинг эътиборини тортди.

Тадқиқотлари давом этар экан, Бен дўстлари ва баъзи олимларни жалб қилди. Улар Беконга тажрибани давом этириш кераклигини маслаҳат берди.

Кейинчалик Бен Дургам университетининг икки профессори ва Лондон университетининг бир гуруҳ экспертлари билан ҳамкорликда тадқиқотларини давом эттирди. Ниҳоят уларнинг ёрдами билан қоятош расмларидаги белгилар сони ой цикллари ва ҳайвонларнинг жуфтлашиш даврларини англатишини аниқлади.

Гуруҳнинг топилмалари Кембриж археологик журналида чоп этилди.

“Натижалар шуни кўрсатадики, музлик даври овчи-йиғувчилари биринчи бўлиб тизим тақвими ва белгиларидан ушбу календардаги асосий экологик ҳодисалар ҳақидаги маълумотларни қайд этиш учун фойдаланганлар”, – дейди Дургам университети профессори Пол Петтит.

Бен Бекон эса ўз тадқиқоти натижаларига қуйидагича изоҳ берди:

“Биз ота-боболаримизга ўзимиз ўйлаганимиздан ҳам кўпроқ ўхшаганмиз. Биздан минг йиллар давомида ажралган бу одамлар тўсатдан янада яқинроқ бўлишди”.

• Буюк Британия
• Muzliklar
• Rasm