Ижтимоий тармоқлар ва айрим ахборот каналларида “Туркияда ўзбекистонликлар депортация қилинмайди” мазмунидаги хабарлар тарқалди. Миграция агентлиги ушбу талқинлар нотўғри эканини маълум қилиб, масала бўйича расмий муносабат билдирди.

Маълум қилинишича, Туркияда ўтказилган сўнгги музокаралар депортацияни тўлиқ бекор қилиш ҳақида эмас, балки фақат аниқ қонуний механизмлар асосида легаллаштириш имкониятлари ҳақида бўлган. Ноқонуний мақомда юриш ёки амалдаги қонунларни бузиш ҳолатларида жавобгарлик сақланиб қолади.

Расмий изоҳда таъкидланишича, айрим манбалар музокаралар мазмунини нотўғри талқин қилиб, кенг жамоатчиликни чалғитувчи хулосалар чиқармоқда. Агентлик фуқароларни фақат расмий манбаларга таянишга чақирган.

Шунингдек, ижтимоий тармоқларда тарқалаётган хабарларга аниқлик киритилар экан, Миграция агентлиги нолегал мақомдаги фуқаролар масаласида муҳим жиҳатга эътибор қаратди. Қайд этилишича, Туркияда ҳозирда ноқонуний мақомда ишлаб юрган ўзбекистонликлар белгиланган тартибда Туркиянинг миграция органларига ёки Миграция агентлигининг ушбу давлатдаги ваколатхонасига мурожаат қилган тақдирда, уларнинг мақомини депортациясиз легаллаштириш имконияти мавжуд.

Бироқ бу ҳолат ноқонуний ишлаган шахс Ўзбекистонга қайтаётганда автоматик тарзда депортациясиз чиқариб юборилади дегани эмас. Агентлик ҳар қандай давлатда фуқаронинг хавфсизлиги ва ҳуқуқлари фақат қонуний мақом ҳамда миграция қонунчилигига риоя қилингандагина таъминланишини таъкидлаб, ижтимоий тармоқ фаолларини хабарларни нотўғри талқин қилмасликка чақирган.

• Агентлик
• Депортация
• Миграция
• Муносабат
• Туркия