Бухоро вилояти Пешкў туман Халқ таълими бўлими бош ҳисобчиси ва унинг ўринбосари жиноий тил бириктириб, йирик миқдордаги мактаб бюджет маблағларини талон-торож қилшгани фош этилди.

Таъкидланишича, Пешкў туман Халқ таълими бўлими бош ҳисобчиси У.Э. ва унинг ўринбосари Р.Э. лавозим ваколатидан фойдаланган ҳолда 2021 йилнинг апрель ойидан 2022 йилнинг январь ойига қадар жами 147 та ҳолатда 217 308 300 сўмлик бюджет маблағларини растрата қилиш йўли билан талон-торож қилишган. Ҳолатга кўра, Халқ таълимига тегишли бўлган ушбу пул маблағлари ноқонуний тартибда сарфланган. Бу пуллар Халқ таълими бўлими ходимлари, тумандаги турли мактабларда ишловчи ишчи-ходимлар, шунингдек, ҳар икки мансабдорнинг қариндош-уруғларининг кредит ҳамда контракт тўловларини сўндириш учун кўчириб берилган.

Жиноят ишлари бўйича Пешкў тумани суди раиси Фаррух Икромовнинг сўзларига кўра, ҳар икки ҳолатда ҳам тўловларни сўндириш учун йўналтирилган бу маблағлар кейинчалик ходимларнинг иш ҳақларидан ушланмай қолган. Маблағлар Р.Э. ҳамда Э.Р.нинг таълим тизимида мутлақо тегишли бўлмаган ўз яқин қариндошларининг кредит қарздорликларини сўндириш учун ноқонуний равишда ўтказиб юборилган.

Мансаб мавқейини суиистеъмол қилиб, ўзгаларнинг кўп миқдордаги мулкини такроран ўзлаштириш ва растрата қилиш йўли билан талон-торож қилганликда ифодаланган жиноий ҳаракатларни содир этган ҳар икки лавозим эгаси ўз айбига тўла иқрор бўлган. Қилмишидан пушаймондалигини билдирган айбдорлар томонидан давлад бюджетига етказилган зарар тўлиқ қоплаб берилган.

“Бирининг 6 нафар, иккинчисининг 4 нафар фарзанди бўла туриб, ўзгаларнинг ҳақини талон-тарож қилишдан иккиланмаган шахсларга нисбатан суд ҳукмига кўра, Жиноят кодексининг Ўзлаштириш ёки растрата йўли билан талон-тарож қилишга қаратилган 167-моддаси, 2-қисми қўлланилди. Ушбу модда билан уларга уч йил ахлоқ тузатиш ишлари жазоси тайинланди”, – деган суд раиси.

• Бухоро
• Фирибгарлик
• Халқ таълими вазирлиги
• pul