Тошкентда 500 кВли “Ҳалқа” подстанцияси ишга туширилди

7 ноябрь куни Тошкент шаҳрида 500 кВ кучланишли янги «Ҳалқа» подстанциясига кучланиш берилди. Бу ҳақда энергетика соҳасига оид маълумотда хабар қилинди.

Қуввати 1602 МВА бўлган мазкур объект пойтахт ва Тошкент вилоятининг бир қисмида электр таъминоти ишончлилигини ошириш, мавжуд тармоқлардаги юкламани қайта тақсимлаш имконини беради.

Янги подстанция ишга туширилиши натижасида Тошкент иссиқлик электр станциясига тушадиган юклама камаяди ва мазутдан фойдаланишга эҳтиёж қолмайди. Бу атмосферага чиқариладиган ифлослантирувчи моддалар миқдорини камайтиришга ҳам хизмат қилади.

Умумий қиймати 171,4 млн доллар бўлган лойиҳа Жаҳон банки иштирокида амалга оширилган. Унинг доирасида 220 кВли 213 км ва 500 кВли 72 км, жами 285 км юқори кучланишли электр узатиш тармоқлари ҳам барпо этилган.

Айни пайтда янги объектларни ягона энергетика тизимига тўлиқ интеграция қилиш бўйича якуний ишлар давом этмоқда.