Жорий йилнинг январь ойида жиноят ишлари бўйича Қоракўл туман судида оғир жиноят иши кўриб чиқилди. Унда оилавий муносабатлар сабабли юзага келган жанжалнинг фожиали оқибати муҳокама қилинди.

Суд раиси Бобораҳим Очиловнинг Xabar.uz'га маълум қилишича, Қоракўл туманининг “Реги Ҳайдар” маҳалласида туғилган 59 ёшли иккинчи гуруҳ Д.Р. Ўзбекистон Республикаси Жиноят кодексининг 104-моддаси (қасддан оғир тан жароҳати етказиш) билан айбланган.

Судда аниқланишича, Д.Р.нинг қудаси Ш.У. қизининг ҳолидан хабар олиш мақсадида унинг яшаш уйига келган. Ш.У. қудасига қизини ҳақоратлаб, мунтазам салбий муносабатда бўлиб келаётгани, бу ёшларнинг оиласига таъсир қилиши мумкинлиги ва бундай ҳаракатларга чек қўйиши кераклиги тўғрисида гапирган. Бир қарашда икки қуда ўртасида оддий суҳбат бўлиб кўринган ўзаро суҳбат кескин жанжалга айланган. Гувоҳлар кўрсатмасига кўра, жанжал аввалида оғзаки тортишув жисмоний зўравонликка айланган. Д.Р. қудаси Ш.Р.ни бир неча маротаба қўл мушти билан юзи ва кўз қисмига урган. Ҳолат жабрланувчининг қизи ҳамда бошқа оила аъзолари кўз ўнгида содир бўлган. Суд-тиббий экспертиза хулосасига кўра, жабрланувчи Ш. Усмонов ўнг кўз олмаси оғир даражада контузияга учраган, тўр парда кўчган, кўз қовоқлари ва склерасида кенг ҳажмли қон қуйилишлар аниқланган. Энг ачинарлиси, ушбу жароҳат натижасида жабрланувчининг ўнг кўзи кўриш қобилияти бутунлай йўқолган.

Экспертлар бу ҳолатни умумий меҳнат қобилиятининг 33 фоиздан ортиғини йўқотишга олиб келувчи оғир тан жароҳати, деб баҳолашди. Мутахассислар жароҳатлар йиқилиш натижасида эмас, айнан, ўтмас қаттиқ жисм, яъни мушт зарбаси билан етказилганини тасдиқлаган.

Судланувчи Раззоқов судда ўз айбига иқрор бўлмаган ва тан олмаган. У ўз кўрсатувида жабрланувчини урмаганини, жанжал вақтида фақат тортишув бўлганини таъкидлаган. Бироқ, суд бу важларни иш материаллари, жабрланувчи ва гувоҳларнинг изчил кўрсатувлари ҳамда суд-тиббий экспертиза хулосалари билан тўлиқ рад этган. Суд айблов хулосасини асосли, деб топган. Шундан сўнг Д.Р. ёши, ногиронлиги ва соғлиги ҳолатини инобатга олишларини ва қамоқ билан боғлиқ бўлмаган жазо тайинланишини сўраган.

Судья эса очиқ суд жараёнида жазо тайинлашда судланувчининг илгари судланмагани ва ногиронлиги каби енгиллаштирувчи ҳолатларни инобатга олган бўлса-да, жабрланувчининг бутун умрга кўр бўлиб қолгани жиноятнинг ўта ижтимоий хавфли эканини кўрсатишини таъкидлади.

Натижада суд Д.Р.ни айбдор деб топиб, унга 5 йил 6 ой муддатга озодликдан маҳрум қилиш жазосини тайинлади. Айбдор жазони умумий тартибли колонияда ўтайдиган бўлди.

Суд жабрланувчи Ш.У.га етказилган моддий ва маънавий зарарларни ундириш масаласида фуқаролик судига мурожаат қилиш ҳуқуқига эгалигини тушунтирган.

“Ушбу иш яна бир бор оилавий келишмовчиликлар ва назоратсиз ғазаб қандай қилиб, инсон ҳаётини батамом ўзгартириб юбориши мумкинлигини кўрсатди. Бир кечада содир бўлган жанжал бир инсонни озодликдан, иккинчисини эса кўз нуридан маҳрум қилди”, – деди Бобораҳим Очилов.

• Бухоро
• Жиноят
• Суд