“Пул Украинада қурол ишлаб чиқаришга сарфланади”, – Зеленский

Украина президенти Владимир Зеленский Лондонга ташрифи чоғида Буюк Британия бош вазири Кей Стармер билан “ишончли хавфсизлик кафолатлари”ни муҳокама қилган. Стармер Украинани қўллаб-қувватлашда давом этишга ваъда берган. Таъкидланишича, Лондон Украина армиясини қўллаб-қувватлаш учун Киевга 2,74 миллиард евро миқдорида кредит берган.

“Музокараларимиз давомида биз Украина ва бутун Европа бугун дуч келаётган муаммоларни, ҳамкорлар билан мувофиқлаштиришни, Украина позициясини мустаҳкамлаш ва урушни адолатли тинчлик, ишончли хавфсизлик кафолатлари билан тугатиш бўйича аниқ қадамларни муҳокама қилдик”, – дейди Буюк Британия бош вазири.

Шунингдек, Украина давлати раҳбари бош вазир билан бўлиб ўтган учрашувни “муҳим ва илиқ” деб атаган. “Украина суверенитети ва хавфсизлигига асосланган барқарор тинчлик Украина, Европа ва Буюк Британия учун муҳим”, - дея қўшимча қилган Стармер.

Зеленский Буюк Британия халқи ва Стармерга қўллаб-қувватлаганликлари, 2 март куни қирол Чарлз III билан учрашиш таклифи ва Лондонда Украина бўйича саммитни ташкил этгани учун миннатдорчилик билдирган. “Биз сизнинг ёрдамингизга ишонамиз”, – дейди Украина раҳбари.

Худди шу куни, яъни кеча, 1 мартда Буюк Британия молия вазири Рейчел Ривз ва Украина молия вазири Сергей Марченко Украина армиясини қўллаб-қувватлаш учун 2,26 миллиард фунт стерлинг (2,74 миллиард евро) миқдорида виртуал кредит шартномасини ҳам имзолаган. Лондон буни “Украина халқининг чексиз ва доимий қўллаб-қувватлаши” исботи деб атамоқда.

“Бизда шундай стратегик ҳамкорлар борлигидан ва келажакка ишонч ҳамма учун қандай бўлиши кераклиги ҳақида бир хил тасаввурга эга бўлганимиздан хурсандмиз”, — дея хулоса қилган Украина президенти.

• Буюк Британия
• Украина