Олий Мажлис Қонунчилик палатаси депутати ва “Миллий тикланиш” ДП Марказий кенгаши раиси Алишер Қодиров ижтимоий тармоқдаги саҳифаси орқали Даврон Кабуловнинг концерт учун таклифига жавоб қайтарди.

Қайд этилишича, “Миллион” жамоаси сардори уни май ойида бўлиб ўтадиган янги концерт дастурига таклиф қилган. Қодиров эса бу учун вақт ажратишини маълум қилган. 

“Даврон Кабулов, таклиф учун раҳмат. Май учун, албатта, режалаштираман. Нима учун “Миллион”ни томоша қилиш керак? Халқ ва ҳокимият ўртасидаги мулоқот доим ҳам очиқ ва самимий бўлавермайди. Буни тан олиш керак. Азалдан бу келишмовчиликни ҳал қилишда ҳазил-мутойибанинг аҳамиятли ўрни бўлган ва ҳозир ҳам шундай. Одамларнинг юзингизга айтавермайдиган танқид ва танбеҳларини ҳазил орқали билиб олишда фойда кўп”, – дея ёзган Алишер Қодиров.

Депутатнинг таъкидлашича, у “Миллион”чиларни муштарак мақсадлар учун партия сафига таклиф қилади: 

“Жамиятни ўзгартириш ҳар биримизнинг ўзгаришларимиздан бошланади. Миллий тикланишимиз сизларнинг иштирокингизда янда жадалроқ бўлишига ишонаман. “Миллион” бу миллион эканига шубҳа йўқ. Фақат бирми ёки ўттиз бешми? Қанча кўп бўлсак ва Ўзбекистон учун бирлаштира олсак шунча тезроқ ўзгарамиз ва ривожланамиз”.

Аввалроқ, жамоа аъзолари “Миллион”нинг концерт дастури орқали Алишер Қодировнинг мигрантларга солиқ жорий қилиш таклифини саҳнага олиб чиққан эди. 

Қайд этиш мумкин, январь ойида Қодиров Тарбия ва таълим вазирлиги ташкил этиш таклифини билдириб, вазирнинг учта – оила ва хотин-қизлар масалаларига, боғчада тарбия ва бошланғич таълимни ташкил этишга ҳамда мактабда таълим-тарбияни ташкил қилишга масъул бўлган ўринбосарлари бўлиши кераклигини айтиб ўтган эди.
 

• Алишер Қодиров
• Депутат
• million