Италия йўлларида агрессив ҳайдовчиларга дуч келиш эҳтимоли энг юқори экани маълум бўлди. Бу ҳақда Euronews нашрида эълон қилинган янги глобал тадқиқот натижаларида қайд этилган.

Тадқиқотга кўра, сайёҳлар орасида машҳур бўлган айрим мамлакатлар автомобиль бошқариш учун нисбатан хавфли ҳудудлар сифатида қайд этилган. Ҳайдовчиларнинг кескин маневрлари, йўлни тўсиб қўйиш, хавфли яқинлашиш, ҳақоратли имо-ишоралар ва йўлда юзага келадиган жанжаллар бунга асосий сабаблар сифатида кўрсатилган.

Сўровнома натижаларига кўра, Италия биринчи ўринни эгаллаган. Респондентларнинг 23 фоизи ушбу мамлакатда рулда кутилмаган ёки масъулиятсиз хатти-ҳаракатларга дуч келганини билдирган.

Буюк Британия 11 фоиз билан иккинчи, АҚШ эса 9 фоиз билан учинчи ўринни эгаллаган. Кейинги ўринлардан Франция ва Австралия 5 фоиздан, Испания ва Туркия эса 4 фоиздан натижа қайд этган.

Тадқиқотда йўллардаги агрессив хатти-ҳаракатларнинг асосий сабабларидан бири сифатида транспорт оқимининг юқорилиги ва тирбандликлар кўрсатилган. Мутахассисларнинг таъкидлашича, ҳайдовчилар стресс ҳолатида ёки кечикаётган пайтда йўл ҳаракати қоидаларини бузишга ва бошқа ҳайдовчиларга нисбатан агрессив муносабатда бўлишга кўпроқ моил бўлади.

Респондентлар йўллардаги агрессиянинг кенг тарқалган кўринишлари сифатида ҳақоратли имо-ишоралар, сигнални ортиқча ишлатиш, автомобиль ойнасидан бақириш ҳамда олдинда ҳаракатланаётган машинага хавфли даражада яқинлашишни қайд этган.

Экспертлар хорижда автомобиль бошқараётган сайёҳларни маҳаллий йўл ҳаракати қоидаларига амал қилишга, эҳтиёткор бўлишга ва йўлларда юзага келадиган можароларга аралашмасликка чақирмоқда.