Тошкент шаҳрининг Яккасарой ва Чилонзор туманларида ўтказилган тезкор-қидирув тадбирлари давомида Telegram орқали наркотик моддалар савдоси билан шуғулланганликда гумонланган икки шахс қўлга олинди.

Ички ишлар вазирлиги Тезкор-қидирув департаменти ҳамда унинг ҳудудий бўлинмалари ҳамкорлигида 3 август куни ўтказилган тадбирлар давомида 1993 йилда туғилган шахс ва 1992 йилда туғилган, аввал Жиноят кодексининг 228-моддаси 1- ва 2-қисмлари ҳамда 168-моддаси билан судланган шахс Яккасарой туманида “закладка” усулида гашиш тарқатаётган вақтида ушланган.

Тезкор ходимлар томонидан уларнинг “Нехиа-3” русумли автомобили кўздан кечирилганда, 20 грамм гашиш ёғи аниқланиб, белгиланган тартибда ҳужжатлаштириб олинган.

Дастлабки маълумотларга кўра, гумонланувчилар 2025 йилдан буён Telegram платформасидаги наркодўконда “омборчи” сифатида фаолият юритиб, ойига қарийб 10 килограммгача турли хил гиёҳвандлик воситаларини тарқатиб келган.

Тезкор тадбирлар уларнинг яшаш манзилларида ҳам давом эттирилган. Тинтув ва кўздан кечириш ишлари натижасида у ердан 2 килограмм гашиш ёғи, марихуана ва гашиш, шунингдек, гиёҳвандлик воситаларини қадоқлаш ва тарқатишда фойдаланилган изоляцион ленталар ҳамда бошқа ашёлар аниқланган.

Мутасадди ташкилотлар маълумотига кўра, тадбир давомида жами 2 килограмм 170 грамм, яъни тахминан 10 700 дозага тенг гиёҳвандлик воситалари ноқонуний муомаладан чиқарилган.

Мазкур ҳолат юзасидан гумонланувчиларга нисбатан Ўзбекистон Республикаси Жиноят кодексининг 273-моддаси 6-қисми билан жиноят иши қўзғатилган.

Ички ишлар органлари фуқароларни гиёҳвандлик воситаларининг ноқонуний тарқалишига оид шубҳали ҳолатлар ҳақида хабар беришга чақирди. Бундай маълумотларни “Стопнарко_бот” Телеграм боти ёки ишонч телефонлари орқали юбориш мумкин.