“Дельфин” тайфуни Хитойнинг шарқий қирғоқларига етиб келиб, кучли ёмғир, сув тошқини ва кўчки хавфини юзага келтирди. Шу сабабли 1 миллиондан ортиқ аҳоли хавфсиз ҳудудларга эвакуация қилинди.

“Reuters” хабарига кўра, “Дельфин” бу йил Хитой ҳудудига етиб келган энг кучли тропик циклон бўлиб, 9 август куни соат 17:30 атрофида Чжетсзян провинциясининг Юйхуан шаҳри яқинидан қуруқликка чиққан.

Тайфун қирғоққа етиб келган вақтда шамол тезлиги 151 км/соатгача етган. Синоптиклар Чжетсзян, Шанхай ва бошқа бир қатор ҳудудларда кучли ёмғир ёғишини прогноз қилган.

Чжетсзяннинг марказий ва шарқий ҳудудларида 250–500 миллиметргача ёғингарчилик кузатилиши мумкин. Бу эса сув тошқини ва кўчки хавфини оширмоқда.

Тайфун сабаб транспорт қатновлари ҳам жиддий чекланган. Шанхайда 30 мингдан ортиқ киши эвакуация қилинган, қарийб 1 500 та авиақатнов бекор қилинган.

Қўшни Чжетсзян провинциясининг Венчжоу шаҳрида эса 900 мингдан ортиқ аҳоли хавфсиз ҳудудларга кўчирилган ва 1 000 дан зиёд фавқулодда бошпана ташкил этилган.

Футсзян провинциясида ҳам қарийб 99 минг киши эвакуация қилинган. Денгиздаги паром қатновлари тўхтатилган, қурилиш лойиҳалари вақтинча бекор қилинган ва юзлаб кемалар хавфсиз ҳудудларга олиб чиқилган.

Метеорологларнинг прогнозига кўра, тайфун Хитойнинг марказий ва жануби-ғарбий ҳудудлари томон ҳаракатланиб, аста-секин кучсизланади. Бироқ кучли ёғингарчилик давом этиши сабабли сув тошқини ва кўчки хавфи сақланиб қолади.

Аввалроқ “Дельфин” тайфуни Япониянинг Окинава префектурасига ҳам етиб келиб, 6 кишининг жароҳатланишига сабаб бўлгани ва 50 мингдан ортиқ хонадон ҳамда бинолар электр таъминотидан узилгани хабар қилинганди.