Жорий йилнинг 8-август куни ижтимоий тармоқларда Мажбурий ижро бюроси ходимлари фуқаронинг уй-жойини огоҳлантиришсиз бузишга урингани ҳақида хабарлар тарқалди.

Мазкур ҳолат Мажбурий ижро бюросининг Сурхондарё вилояти бошқармаси томонидан ўрганилди.

Ўрганишлар давомида маълум бўлишича, ушбу ҳолат Денов туманлараро фуқаролик ишлари бўйича судининг 2025-йил 29-декабрдаги ижро ҳужжати асосида амалга оширилган.

Суд ҳужжатига кўра, Денов тумани Ғалаба массиви, “Чуқурқишлоқ” маҳалласи ҳудудида қишлоқ хўжалигига мўлжалланган суғориладиган ер майдонининг 0,20 гектар қисми ўзбошимчалик билан эгалланган. Ушбу ҳудудда қурилган уй-жой ва бошқа ноқонуний қурилмаларни бузиш ҳамда ер майдонини асл ҳолатига келтириш белгиланган.

Мазкур ижро ҳужжати 2026-йил 24-январь куни Мажбурий ижро бюросининг Денов туман бўлими иш юритувига келиб тушган ва ижро иши қўзғатилган. Қарздорлар суд ҳужжати талабларини бажариш зарурлиги ҳақида белгиланган тартибда огоҳлантирилган.

Шунингдек, суд ажримига асосан ижро ҳаракатлари муайян муддатга тўхтатиб турилган. Кейинчалик суд кўрсатмасига мувофиқ мазкур тўхтатиш бекор қилиниб, ижро ҳаракатлари давом эттирилган.

Қарздорлар томонидан суд ҳужжати талаблари ихтиёрий равишда бажарилмагани сабабли 2026-йил 7-август куни мажбурий ижро ҳаракатлари белгиланган. Бу ҳақда тегишли ташкилотлар ҳам хабардор қилинган.

Натижада суд ҳужжатида кўрсатилган ноқонуний қурилмалар белгиланган тартибда бузилиб, ер майдонини асл ҳолатига келтириш бўйича суд ҳужжати ижроси тўлиқ таъминланган.

Шу муносабат билан ижтимоий тармоқларда тарқалган “фуқаронинг уй-жойи огоҳлантиришсиз бузилмоқчи бўлинган” мазмунидаги хабарлар ҳақиқатга тўғри келмаслиги маълум қилинади.