Ўқув йили бошланиши арафасида Тошкент шаҳрига турли ҳудудлардан келаётган талабалар ва уларнинг яқинларини интернетдаги сохта ижара эълонлари орқали алдаш ҳолатлари кўпаймоқда.

Тошкент шаҳар ИИББ маълумотларига кўра, фирибгарлар ўзларига тегишли бўлмаган хонадонларнинг суратларини интернетга жойлаштириб, уларни арзон нархда ижарага беришни таклиф қилмоқда.

Талабалар ёки уларнинг ота-оналари эълон бўйича мурожаат қилганида эса фирибгарлар уйни “банд қилиб қўйиш” ёки икки ойлик ижара ҳақини олдиндан тўлашни талаб қилади. Пул ўтказилгач, улар алоқани узиб, ижтимоий тармоқларда блоклаб қўяди.

Натижада фуқаро на уйга эга бўлади, на тўлаган пулини қайтариб олади.

ИИББ фуқароларни огоҳликка чақирди:

Уйни кўрмасдан туриб, ҳеч қачон олдиндан пул тўламанг.

Ижара шартномасини фақат хонадонни шахсан кўриб, унинг эгаси билан учрашганингиздан сўнг тузинг.

Ишонч ҳосил қилмагунингизча паспорт маълумотлари ва бошқа шахсий маълумотларингизни бегона шахсларга юборманг.

Талабалар турар жойига ариза топшириш

Талабалар турар жойлари учун аризалар 1 августдан бошланган. Аризаларни my.gov.uz портали орқали юбориш мумкин.

Аввало имтиёз ва устуворликка эга талабалар ётоқхоналарга қабул қилинади. Шундан сўнг қолган ўринлар умумий рўйхатдаги талабалар ўртасида навбат асосида тақсимланади:

▪️ 1-курс талабалари — 55–65 фоиз;

▪️ 2-курс талабалари — 15–20 фоиз;

▪️ 3-курс ва ундан юқори курс талабалари — 20–25 фоизгача.

Аризалар қабули ўқув йили якунигача давом этади.

Арзон ижара таклифларига алданиб қолманг — аввало хонадон ва унинг эгасини текширинг!