Ўзбекистонда 18 ёшдан катта аҳолининг 64 фоизи ортиқча вазнга эга. Бу кўрсаткич Марказий Осиё ва МДҲ давлатлари орасидаги энг юқори натижалардан бири ҳисобланади.

“Оур World in Data” Жаҳон соғлиқни сақлаш ташкилоти маълумотлари асосида келтирган статистикага кўра, 1980 йилда Ўзбекистонда катталарнинг 28 фоизи ортиқча вазнли бўлган. Ҳозир эса бу кўрсаткич 64 фоизга етган.

Марказий Осиёдаги бошқа давлатларда ортиқча вазнли катталар улуши:

 Туркманистон — 58%

Тожикистон — 58%

 Қозоғистон — 56% Қирғизистон — 56%

МДҲ давлатларидан Россияда бу кўрсаткич 56%, Беларусда эса 55%ни ташкил этади.

🇺🇿 Ўзбекистонда 18–64 ёшдаги аҳолининг қарийб 20 фоизи клиник семизлик мезонларига жавоб беради.

Мутахассислар ортиқча вазн ва семизлик юрак-қон томир касалликлари, юқори қон босими ҳамда 2-тоифа қандли диабет хавфини оширишини таъкидламоқда.

Бундан ташқари, Ўзбекистонда бир кишига тўғри келадиган ўртача кунлик туз истеъмоли 14,9 граммни ташкил этади. Бу ЖССТ тавсия қилган 5 грамм миқдордан қарийб 3 баробар кўп.

Аҳолининг тахминан учдан бир қисми етарли миқдорда мева ва сабзавот истеъмол қилмайди. Шунингдек, аҳолининг 46 фоизида холестерин миқдори юқори экани қайд этилган.

Дунё бўйича эса аҳолининг қарийб 45 фоизи ортиқча вазнга эга. АҚШда бу кўрсаткич 71%, БААда 70%, Буюк Британияда 62%, Японияда эса 24%ни ташкил этади.