Самарқанд туманини алоҳида маъмурий-ҳудудий бирлик сифатида тугатиш ва Самарқанд шаҳри чегараларини кенгайтириш бўйича таклиф Олий Мажлис Қонунчилик палатасида маъқулланди.

Қарорга кўра, Оқдарё туманидан 1 410,6 гектар, Пастдарғом туманидан 1 242,3 гектар, Самарқанд туманидан 13 308 гектар ҳамда Тойлоқ туманидан 1 265,6 гектар ер майдони Самарқанд шаҳри таркибига ўтказилади. Натижада шаҳарга жами 17 минг гектардан ортиқ ҳудуд қўшилади.

Чегаралар ўзгариши натижасида Самарқанд шаҳрининг умумий ҳудуди 11,8 минг гектардан 28,9 минг гектаргача кенгаяди. Шунингдек, шаҳар аҳолиси 604 минг нафардан 882 минг нафаргача ошиши кутилмоқда.

Мазкур ўзгаришлар Самарқандни “миллионли шаҳар”га айлантириш, замонавий турар-жой ва нотурар бинолар қуриш ҳамда янги инфратузилма лойиҳаларини амалга ошириш учун имконият яратиши кўзда тутилган.

Шунингдек, “Ширин” шаҳарчаси, “Темир йўл орти” ҳудуди ва “Қорасув-2” массивларида 309 минг аҳолига мўлжалланган 710 та кўп қаватли уй-жой қурилиши режалаштирилмоқда.

Шаҳар ҳудудида янги туристик лойиҳалар, аквапарклар, истироҳат боғлари, ўйин майдонлари, ҳаво шарлари учун масканлар, яшил ҳудудлар, хизмат кўрсатиш объектлари ва логистика марказларини ташкил этиш ҳам режалаштирилган.