“Samsung Galaxy S23” батареяни четлаб ўтиб, тўғридан-тўғри розеткадан қувват олиш функцияси мавжуд экани маълум бўлди.

Таъкидланишича, “Galaxy S23” смартфонларининг асосий хусусиятларидан бири янги кучли “Snapdragon 8 Gen 2” процессори бўлиб, у энг талабчан ўйинларни енгиш имконини беради. Аммо, маълум бўлишича, бу геймерлар учун энг қизиқарли янгилик эмас.

“NL Tech” “YouTube” канали муаллифи “Galaxy S23 Ultra”да “USB Power Delivery Pause” деб номланган созлама топилгани ҳақида маълум қилди. Қайд этилишича, фойдаланувчилар смартфонни розеткага улаганида, у батареяни четлаб ўтиб, қурилмани тўғридан-тўғри адаптердан қувватлантириш имконини беради.

“Смартфон ҳароратини пасайтириш ва батарея қувватини сарфламасдан ўйнаш имконини берувчи “Game Booster” ўйин ёрдам дастурини ишга туширганингизда USB қувват етказиб беришни тўхтатиб туриш автоматик равишда ёқилади”, дейилади хабарда.

Бу шуни англатадики, ҳатто кунлик ўйин сеансларида ҳам батарея вақт ўтиши билан бузилмайди ва қувват сақлаш қобилиятини йўқотмайди.

Шундай қилиб, “Galaxy S23 Ultra” тўғридан-тўғри зарядланиш функцияси фаол бўлганда атиги 6 Вт қувват сарфлайди ва қурилманинг ўзи ишлаши билан параллел равишда ўрнатилган батарея қувватланаётганда 17 Вт сарфлайди.

Эътибор беринг, ушбу қувват режими биринчи марта “Samsung” томонидан эмас, балки ўйин смартфонлари ишлаб чиқарувчилари томонидан ишлатилган. Шунга ўхшаш созламалар мавжуд, масалан, “Asus ROG Phone 5” va “ROG Phone 6” – уларда бундай зарядлаш учун махсус портлар ҳам мавжуд.

Қайд этиш мумкин, бир неча кун аввал “Samsung” компанияси “Galaxy Unpacked” тақдимоти чоғида янги “Galaxy S23” флагман смартфонларини тақдим этди.

Сериядаги энг ҳамёнбоп қурилма – “Galaxy S23” нархи 799 доллар ёки тахминан 9 млн сўмни ташкил қилади. “Galaxy S23 Ultra” 1199 доллар ёки тахминан 13,5 млн сўмга баҳоланган. “Samsung” ўз веб-сайтида флагманларга олдиндан буюртма бериш имкониятини очган.

• Samsung
• Smartfon