Германияда 2026-йил бошидан буён жазирама иссиқ билан боғлиқ ўлимлар сони қарийб 12,5 минг кишига етди. Роберт Кох институти ушбу кўрсаткич сўнгги ўн йилдаги энг юқори натижа эканини маълум қилди.

Мутахассислар ҳисоб-китоби эҳтиёткорлик билан амалга оширилгани сабабли, иссиқ ҳаво оқибатида вафот этганлар сони амалда бундан ҳам кўп бўлиши мумкин.

Аввалги рекорд 2018-йилда қайд этилган

Германияда жазирама сабабли ўлимлар бўйича аввалги энг юқори кўрсаткич 2018-йилда кузатилган. Ўша йили иссиқ ҳаво оқибатида қарийб 9,4 минг киши вафот этган. 2019-йилда эса бу кўрсаткич 7,7 мингга яқин бўлган.

Жорий йилда жазираманинг энг кучли таъсири Саар ва Рейнланд-Пфалс федерал ерларида қайд этилган. Бу ҳудудларда ҳар 100 минг аҳолига мос равишда 43,4 ва 38,7 та ўлим тўғри келган. Германия бўйича ўртача кўрсаткич эса 100 минг аҳолига 15 та ўлимни ташкил қилган.

Қурбонларнинг аксарияти кексалар

Жазирама энг кўп ёши катта одамларга таъсир қилган. 85 ёш ва ундан катталар орасида қарийб 6,3 мингта ўлим қайд этилган. 75–84 ёш гуруҳида эса 3,1 мингдан ортиқ киши иссиқ ҳаво оқибатида вафот этган.

Фақат июнь ойидаги жазираманинг ўзи Германияда тахминан 5,1 минг кишининг ўлимига сабаб бўлган. Ўша пайтда мамлакатнинг айрим ҳудудларида ҳаво ҳарорати 40 даражадан ошган.

Ҳозир Германияда яна иссиқ ҳаво тўлқини кузатилмоқда, бироқ у июнь охиридаги жазирамага қараганда нисбатан кучсизроқ.

Ғарбий Европада рекорд иссиқ

2026-йилнинг июнь ва июль ойлари Ғарбий Европада кузатувлар тарихидаги энг иссиқ даврлардан бири бўлди. Cоперниcус маълумотларига кўра, ушбу икки ойда ўртача ҳарорат 1991–2020-йиллардаги кўрсаткичдан 2,79 даража юқори бўлган.

Германиянинг собиқ соғлиқни сақлаш вазири Карл Лаутербах жазирама оқибатларига қарши чораларни кучайтиришга чақирди. У мамлакат бўйлаб иссиқ ҳаво ҳақида маълумот берувчи порталлар ва ишонч телефонларини ташкил этиш зарурлигини таъкидлади.

Германия Атроф-муҳит ва иқлимни муҳофаза қилиш вазирлиги давлат котиби Ёхен Фласбарт эса 2027-йил ёзигача экстремал иссиққа қарши миллий режа ишлаб чиқишни таклиф қилди.

Немис шифохоналари ассотсиатсияси тиббиёт муассасаларидаги совитиш тизимларини модернизатсия қилиш зарурлигини билдирди. Ташкилот маълумотларига кўра, Германия клиникаларидаги палаталарнинг фақат кичик қисми кондитсионерлар билан жиҳозланган.