Беларусда 10-синф ўқувчилари учун ҳарбий-амалий тайёргарлик дастури кенгайтирилмоқда. Янги дастур доирасида ўқувчиларга учувчисиз учиш аппаратларини бошқариш, қизларга эса тактик тиббиёт асослари ўргатилади. Бу ҳақда Беларус таълим вазири ўринбосари Александр Кадлубай маълум қилди.

Унинг сўзларига кўра, 10-синф ўқувчилари учун ишлаб чиқилган дастурда дронларни бошқариш бўйича 10 соатлик амалий курс мавжуд. Қизлар учун тиббий тайёргарлик дастури ҳам кенгайтирилиб, унга тактик тиббиёт элементлари киритилган.

“Амалий машғулотлар ҳажмини оширдик. Соф назариядан реал шароитларда зарур бўладиган аниқ кўникмаларга ўтдик”, — деди Кадлубай.

Мактабларда ҳарбий-ватанпарварлик йўналиши кучаймоқда

Беларусда таълим тизимини ҳарбийлаштириш жараёни ҳам кучайиб бормоқда. Жорий йилдан 10-синф ўқувчилари учун 10 кунлик ўқув-дала йиғинларида қатнашиш мажбурий этиб белгиланган.

Шунингдек, мактабгача таълим муассасаларида “ҳарбий-ватанпарварлик” йўналишидаги гуруҳлар, мактаб ва коллежларда эса шу йўналишдаги клублар ташкил этилмоқда.

Бу ўзгаришлар Беларусда ҳарбий-амалий кўникмаларни ёшлар таълимининг бир қисмига айлантириш жараёни кучаяётганини кўрсатмоқда.

Беларусда ҳарбий тайёргарлик кучаймоқда

Сўнгги ойлар давомида Беларусда ҳарбий тайёргарлик ва мудофаа инфратузилмасига эътибор кучайган.

Июл ойида Александр Лукашенко унинг буйруғи билан махсус оператсия кучлари Украина чегараси бўйлаб жойлаштирилганини маълум қилган. 2026-йил бошидан буён мамлакатда 43 та бомбапаноҳ ҳам қайта тикланган.

Июн ойида Беларус Мудофаа вазирлиги Полша ва Литва билан чегарадош Гродно вилоятида ҳарбий машғулотлар ўтказган. Унда фуқаролар ва транспорт воситаларини сафарбар қилиш бўйича ҳаракатлар ҳам синовдан ўтказилган.

Бундан аввал Россиянинг Беларус ҳудудидан Украинага қарши янги фронт очиш ва НАТОга қарши дрон ҳамда гибрид оператсиялар учун фойдаланишни кўзлаётгани ҳақида хабарлар тарқалган эди. Лукашенко эса Беларус Украинага қарши урушга қўшилишни истамаслигини билдирган.