Наманган шаҳрида яшовчи шахс Чуст туманида истиқомат қилувчи 4 нафар фуқарони “Ҳаж-2026” мавсумида ислом динининг асосий фарзини адо этиш учун уларни ноқонуний йўллар билан Саудия Арабистонига юборишни ваъда қилган.

У мазкур “хизмат” эвазига жами 26 минг АҚШ доллари талаб қилган.

Давлат хавфсизлик хизмати ва Ички ишлар органлари ходимлари ҳамкорлигида Чуст туманида ўтказилган тезкор тадбир давомида у сўралган пул маблағидан 6 минг АҚШ долларини олаётган вақтида ашёвий далиллар билан ушланди.

Ҳозирда ушбу ҳолат бўйича унга нисбатан Жиноят кодексининг 168-моддаси (фирибгарлик) 4-қисми “а” банди билан жиноят иши қўзғатилган. Тергов ҳаракатлари олиб борилмоқда.