Қозоғистоннинг Манғистов ҳудудида кузатилган кучли ёғингарчиликлар жиддий оқибатларга олиб келди — юздан ортиқ от нобуд бўлди.

Маълум қилинишича, жала ёмғирлардан кейин ҳайвонлар шўрхок ва ботқоқ ҳудудларга тушиб қолган. Натижада уларнинг кўпчилиги лойга ботиб ҳалок бўлган, айримлари эса ҳануз чиқиб кета олмаяпти.

Маҳаллий аҳоли ижтимоий тармоқларда оғир вазият ҳақида ёзиб, деярли ҳар бир хонадон бир нечтадан ўнтагча чорвасидан айрилганини билдирган.

“Ёмғирдан кейин чорва сув оқими билан оқиб кетиб, шўрхок жойларга тушиб қолди. Кўплаб отлар лойга ботиб нобуд бўлди. Ҳали ҳам чиқолмаётганлари бор. Агар тез ёрдам берилмаса, вазият янада оғирлашади”, — дея ёзади аҳоли вакиллари.

Расмийларга кўра, 14–15 апрел кунлари кузатилган ноқулай об-ҳаво оқибатлари ҳозирда бартараф этилмоқда. Сайотес қишлоғи атрофида ва темирйўл бўйлаб чорва нобуд бўлган ҳудудлар аниқланган.

Ҳолатни ўрганиш учун махсус комиссия тузилган. Дастлабки маълумотларга кўра, юздан ортиқ от топилган, аммо аниқ рақамлар ҳали ҳисоблаб чиқилмоқда.

Мутахассислар бу ҳолатга кучли шамол ва жала ёмғир сабаб бўлганини айтмоқда. Йўлдан адашган ҳайвонлар узоқ ва етиб бориш қийин ҳудудларда қолиб кетган. Айрим подалар эса аҳоли яшаш жойларидан 60–80 километр узоқликда нобуд бўлган бўлиши мумкин.

Қидирув ишлари дронлар ёрдамида олиб борилмоқда. Махсус штаб ташкил этилиб, йирик корхоналар техникаси ҳам жалб қилинган.

Расмийлар барча куч ва воситалар сафарбар этилганини, вазият назорат остида эканини маълум қилди.

Эслатиб ўтамиз, аввалроқ ушбу ҳудудда Каспий денгизи қирғоғида 191 та ўлик тюлень топилгани ҳам хабар қилинганди.