31°
Кечаси 18°
Қишлоқ хўжалиги вазирлиги ҳамда Фермерлар кенгаши фермерлар, деҳқон хўжаликлари раҳбарлари ва чорвадорларга мурожаат билан чиқиб, 18 апрелдан 18 майгача Ўзбекистонда “Чорвачиликда санитария-эпидемия-гигиена” ойлиги эълон қилинганини билдирди. Мурожаатда қайд этилишича, бугунги кунда дунёда экологик мувозанат ва иқлим ўзгариши натижасида чорва ҳайвонлари орасида турли янги касалликлар юзага келмоқда. Хусусан, хорижий давлатларда чорва моллари ўртасида оқсил (яшур) касаллиги тарқалиш хавфи кенгаймоқда. Жаҳон ҳайвонлар соғлиги ташкилоти маълумотига кўра, 2025–2026 йилларда 48 та давлатда ушбу касалликнинг янги “SAT” типлари қайд этилган бўлиб, амалда қўлланилаётган вакциналар бу типларга қарши тўлиқ ҳимоя қилмайди. Шу сабабли касаллик тарқалишининг олдини олишда барча фермер ва чорвадорларнинг масъулияти ва фаол иштироки ниҳоятда муҳим ҳисобланади. Шу муносабат билан, хўжалик ва фермаларда ветеринария-санитария тартибларига қатъий риоя қилиш, кириш жойларида дезинфекция воситаларини ташкил этиш, бегона шахслар ва транспорт воситаларининг киришини чеклаш, ҳайвонларни сақлашда зоогигиеник талабларга амал қилиш, уларни сифатли озуқа ва тоза сув билан таъминлаш, ҳудудни доимий тозаликда сақлаш ҳамда зарарли жониворларга қарши курашиш зарурлиги билдирилди.
Мутасаддилар ҳайвонларда юқори ҳарорат, оғиз бўшлиғида ва туёқларда яралар, елинда шикастланишлар кузатилганда зудлик билан ветеринария шифокорига мурожаат қилиши зарурлиги таъкидланди. Бундай ҳолатларда биноларни дезинфекция қилиш, ҳайвон маҳсулотларини ҳудуддан ташқарига чиқармаслик ва сутни қайнатмасдан истеъмол қилмаслик лозим.
Қишлоқ хўжалиги вазирлиги ҳамда Фермерлар кенгаши чорва саломатлигини сақлашда тозалик ва ветеринария қоидаларига амал қилиш энг муҳим омил эканини билдириб, фермерлар ва чорвадорлардан мазкур ойлик доирасида барча профилактик ва эпизоотик тадбирларни уюшқоқлик билан амалга оширишга чақирди. Касаллик аломатлари кузатилганда (71-202-12-00, ички: 210, 218, 323) рақамлари орқали мутахассисларга мурожаат қилиш мумкин.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
