18-апрел куни Саудия Арабистонидан Туркия орқали Ўзбекистонга қайтаётган 82 нафар фуқаромиз Истанбулдаги “Сабиха Гёкчен” халқаро аэропортида мураккаб ҳолатга тушиб қолгани маълум бўлди.

Дастлабки маълумотларга кўра, зиёратчилар “Ihlos Travel” ва “Hikmat Travel” туристик фирмалари орқали “Эр-Риёд — Истанбул — Чимкент — Тошкент” йўналишида сафар қилишни режалаштирган. Бироқ, хизмат кўрсатувчи томонлар ўз мажбуриятларини тўлиқ бажармагани сабабли йўловчилар хорижда ноқулай вазиятда қолиб кетган.

Вазият юзасидан тегишли идоралар томонидан тезкор чоралар кўрилди.
Натижада фуқароларнинг транзит ҳудудида бўлиши давомида уларга озиқ-овқат, транспорт ва бошқа зарур хизматлар тақдим этилди. Шунингдек, уларни белгиланган йўналиш бўйича хавфсиз тарзда Ўзбекистонга қайтариш ишлари назоратга олинди.

Расмийлар фуқаролар ва туристик фирмаларни келгусида бундай ҳолатларга йўл қўймаслик учун сафар ҳужжатларини олдиндан тўлиқ расмийлаштириш, транзит йўналишлар ҳақида аниқ маълумот бериш ҳамда йўловчилар билан доимий алоқада бўлишга чақирди.