Ҳиндистон ғарбидаги Гужарат штатида чақмоқ уриши оқибатида камида 24 киши ҳалок бўлди, 23 киши жароҳат олди. Мамлакатда бир неча кундан буён момақалдироқ ва кучли жала ёғиши давом этмоқда.
The Independent нашрининг ёзишича, чақмоқ 71 бош ҳайвонни нобуд қилган ва 29 та уйга зарар етказган. Энг кўп ўлим Даҳод шаҳрида қайд этилган.
Ҳиндистон ғарбида кучли ёмғир 26 ноябрда бошланди, 27 ноябрь куни штатнинг айрим ҳудудларида кун бўйи давом этди. Баъзи ҳудудларда бир кунда 144 миллиметр ёғингарчилик кузатилди.
Кучли циклон ортидан юзага келган ёғингарчилик экинларга зарар етказди ва бир қанча корхоналарнинг ёпилишига олиб келди. Гужарат ҳукумати яқин орада табиий офат етказган зарарни баҳолашни бошлайди.
Гужаратда шунга ўхшаш табиий офатлар аввал ҳам содир бўлган. 2020 йилда бу ерда икки кун ичида 14 киши яшин уриши ва сув тошқини оқибатида ҳалок бўлган.

• Ҳиндистон