2024 йилга қадар сотувга чиқарилиши кутилаётган флагман – “iPhone 16 Pro” дисплей ёқилганда кўринмайдиган экран остидаги Face ID сенсорлари билан жиҳозланади. Бу ҳақда Кореянинг “The Elec” нашри хабар бермоқда.

Бундай технология ҳақидаги миш-мишлар илк бор ўтган йили пайдо бўлган, бироқ прогнозлар қайта-қайта ўзгарган – яширин сенсорлар “iPhone 14 Pro”да мавжуд эмас ва жорий йил охирида чиқадиган “iPhone 15”да ҳам ушбу функция бўлмайди.

Кечикишнинг асосий сабаби шундаки, зарур технологиялар ҳали амалга оширишга тайёр эмас. Баъзи Андроид қурилмалари ишлаб чиқарувчилари камераларни дисплей остида яширишга ҳаракат қилиб кўрган (масалан, ZTE), лекин уларнинг амалга оширилиши камеранинг тасвирга олиш сифатини пасайтирди.

“Samsung Galaxy Z Fold 3”да яширин селфи модули билан боғлиқ тажриба ўтказилган, бироқ сенсорнинг ўзи дисплей ёқилган ва сурат сифати ҳақида гапирилмаган тақдирда ҳам у кўриниб туради.

Face ID нафақат фотомодулга, балки қўшимча “TrueDepth” инфрақизил камерасига ҳам асосланган ва бу технологик вазифани янада қийинлаштиради. “The Verge” нашри маълумотларига кўра, охир-оқибат “iPhone 16 Pro”да аввалги моделлардаги каби селфи камера мавжудлигини кўрсатувчи тешиклар қолдирилиши мумкин, аммо бу минимал бўлади.

Маълумотларга кўра, “iPhone 16” модели аввалги “аждодлари”га қараганда мутлақо янгича дизайнга ҳам эга бўлиши мумкин.

• Apple
• iPhone