“GizmoChina” журналистларининг хабар беришича, оғир юк остида “iPhone 15 Pro” смартфони корпуси Цельций шкаласи бўйича 48 даражагача қизийди. Бу танани биринчи даражали куйишга олиб келиши мумкин.

“iPhone 15 Pro” TSMC томонидан ишлаб чиқарилган 3 нанометрли “A17 Pro” чипи асосида ишлаб чиқилган. “Apple” маълумотларига кўра, чип ўз авлоди ичида энг кучлисига айланди, бироқ мутахассислар юкланиш остида у жуда қизиб кетишини ва стандарт пассив совутиш ҳар доим ҳам ҳароратни пасайтириш учун етарли бўлмаслигини пайқашди.

“Insider Revegnus” X платформасида (“Twitter”) “iPhone 15 Pro”нинг иш пайтидаги иссиқлик харитасининг суратини жойлаштирди. Қурилма процессор ҳудудида энг кўп қизийди. Корпуснинг ҳарорати Цельций шкаласи бўйича 48 даражага етади. Мутахассисларнинг фикрича, “Apple” процессорни қайта ишлаш қувватини ошириш йўлини муваффаққиятли бўсиб ўтди, бироқ батарея қуввати ва қизиб кетишни эътиборсиз қолдирган.

Мутахассислар, шунингдек, узоқ вақт давомида таъсир қилиш билан 48 даража ҳарорат биринчи даражали куйишга олиб келиши мумкинлигини таъкидладилар. Ҳаддан ташқари иссиқлик ҳам қурилманинг ишлашига таъсир қилади. “TechTablets” YouTube канали муаллифи атиги икки дақиқа фаол ишда процессор унумдорлиги 25 фоизга, 20 дақиқадан сўнг эса GPU унумдорлиги 34 фоизга пасайганини маълум қилди.

Аввалроқ, “iPhone 15 Pro Max”нинг титандан ясалган корпуси осон эгилиши ва тез синиши маълум бўлган эди. Крэш-тестларда ҳам айнан янги модель аввалгиларига нисбатан сифатсизроқ экани аниқланганди.

Қайд этиш мумкин, “iPhone 15” “Apple”нинг ўн еттинчи авлод гажети ҳисобланади. Қурилма 2023 йилнинг 12 сентябрь куни Калифорния штати Купертино шаҳридаги “Apple Park”да бўлиб ўтган онлайн тадбирда тақдим этилди. Олдиндан буюртмалар 15 сентябрдан бошланган ва бир ҳафтадан сўнг, 22 сентябрда сотувга чиқарилган.

• Smartfon
• iPhone
• технология