15 июль куни Исроил армияси Сурия жанубидаги Ас-Сувайда вилоятида ҳукумат қўшинларига зарбалар йўллади. Исроил буни озчиликни ташкил этувчи друзларни ҳимоя қилиш мақсадида амалга оширганини билдирмоқда.

BBC хабарига кўра, сўнгги кунларда Суриянинг, асосан, друзлар истиқомат қиладиган ҳудудларида бадавий қабилалар ҳамда маҳаллий жангарилар ўртасида бошланган тўқнашувлар оқибатида камида 37 киши ҳалок бўлган.

Маълумотларга кўра, бадавий қабилаларга мансуб жангчилар ва друзлар кучлари ўртасидаги тўқнашувлар илгари Ас-Сувайда шаҳридан шарқда жойлашган, асосан бадавийлар яшовчи Маквас ҳудудида юз берган. Бу ҳудудни друзларнинг қуролли гуруҳлари қуршаб олиб, кейинчалик ўз назоратига олган. Уйлар миномётлардан ўққа тутилган, ўнлаб одамлар яраланган. Ас-Сувайда кўчалари ҳувиллаб қолган. Вилоятнинг ғарбий қисмидаги тўқнашувлар ва қишлоқларнинг ўққа тутилиши оқибатида шифохоналар ўнлаб ярадорлар билан тўлган.

Сурияда инсон ҳуқуқларига риоя этилишини мониторинг қилиш маркази (СОҲР) эса камида 99 киши ҳалок бўлганини, улардан икки нафари бола, икки нафари аёл, 14 нафари эса хавфсизлик кучлари ходимлари экани ҳақида хабар берган.

• Isroil
• Suriya