Исроилда хантавирус билан касалланишнинг биринчи ҳолати қайд этилди. Бу ҳақда The Jerusalem Post хабар берди.

Маълум қилинишича, бемор бир неча ой олдин Шарқий Европага саёҳат қилган ва вирусни ўша ҳудудда юқтириб олган бўлиши мумкин. Унда касаллик белгилари пайдо бўлгач, тиббий ёрдамга мурожаат қилган. Дастлаб антитаналар бўйича ўтказилган тест хантавирус мавжудлигини кўрсатган, кейинчалик ПЦР-тест касалликни расман тасдиқлаган.

Беморнинг аҳволи барқарор деб баҳоланмоқда. У интенсив терапия ёки қатъий изоляцияга муҳтож эмас. Унинг шахси ва даволанаётган шифохонаси очиқланмаган. Аниқланган вирус штамми Атлантика океанидаги MV Hondius круиз лайнерида тарқалган штаммдан фарқ қилиши айтилмоқда. ЖССТ маълумотига кўра, ушбу кемада хантавирус сабабли икки киши вафот этган ва камида саккиз киши касалланган.

Бортида 150 га яқин йўловчи бўлган MV Hondius кемаси Испанияга йўл олган ва 10 май куни Тенерифе оролига етиб бориши режалаштирилган. Ҳозирда кемада касаллик белгилари бўлган йўловчилар йўқлиги билдирилган.

Reuters хабарига кўра, бир қатор давлатлар касаллик тарқалишининг олдини олиш мақсадида кемадан тушган йўловчиларни кузатувга олган. Вирус ҳақида хабарлар пайдо бўлишидан олдин 40 га яқин йўловчи Санта-Елена портида кемани тарк этган. Уларнинг аксарияти ҳозирча аниқланмаган.

Хантавирус — кемирувчилардан, асосан уларнинг чиқиндилари орқали юқадиган вируслар гуруҳи бўлиб, оғир ўпка ва буйрак шикастланишига олиб келиши мумкин. Касаллик иситма, бош ва мушак оғриқлари, кўнгил айниши ҳамда ҳолсизлик билан кечади. Махсус даво йўқ, фақат қўллаб-қувватловчи терапия қўлланади.