Жаҳон соғлиқни сақлаш ташкилоти (ЖССТ) маълумотларига кўра, 2024 йилда дунё бўйича семизлик 3,7 млн кишининг ўлимига сабаб бўлган. Ташкилот, шунингдек, 5 ёшдан 19 ёшгача бўлган 170 млн нафар бола ва ўсмир семизликдан азият чекаётганини маълум қилди.

Уларнинг 70 млн нафари 5–9 ёшдаги болалар, 100 млн нафари эса 10–19 ёшдаги ўсмирлардир. Мазкур ёш гуруҳида семизликнинг тарқалиши 1990 йилдан буён тўрт баравар ошган: ўша йили кўрсаткич 2 фоизни ташкил этган бўлса, 2024 йилда 8 фоизга етган.

ЖССТ болаларда семизликни даволаш бўйича илк тавсияларини ҳам эълон қилди. Унда жисмоний фаолликни ошириш, соғлом овқатланиш ва хулқ-атворни ўзгартиришга қаратилган чоралар тавсия этилган. Ташкилот 9 ёшгача бўлган болаларда семизликни даволаш учун дори воситалари, вазн камайтиришга қаратилган жарроҳлик амалиётлари ёки махсус қурилмалардан фойдаланишни тавсия этмайди.

Ташкилотнинг таъкидлашича, семириш муаммосини фақат даволаш орқали ҳал этиб бўлмайди. Шу боис давлатлар соғлом овқатланиш ва жисмоний фаолликни аҳоли учун янада қулай ва ҳамёнбоп қилишга қаратилган чораларни кўриши керак.

ЖССТ маълумотларига кўра, семизлик юрак-қон томир касалликлари, 2-тур диабет ва айрим саратон турларини ўз ичига олган юқумли бўлмаган касалликлар ривожланишининг асосий омилларидан биридир. Тегишли чоралар кўрилмаса, 2030 йилга бориб дунёда семизликдан азият чекаётганлар сони икки баравар ошиши мумкин.