Жорий йилнинг июнь ойида Жаҳон океани юзаси ҳарорати кузатувлар тарихидаги июнь ойлари учун энг юқори даражага етди. Бу ҳақда Европанинг Copernicus Marine мониторинг хизмати маълум қилди. Ҳисоботга кўра, океан юзасининг ўртача ҳарорати 20,94 даражани ташкил этиб, 2023 ва 2024 йилларда қайд этилган рекорд кўрсаткичлардан ҳам ошган. Натижада 2026 йилнинг дастлабки олти ойи океанлар учун кузатувлар тарихидаги энг иссиқ даврлардан бири сифатида қайд этилди.

Мутахассислар таъкидлашича, денгиздаги иссиқлик тўлқинлари йил давомида узлуксиз кенгайиб, июнь ойи якунига келиб Жаҳон океанининг қарийб 82 фоизини қамраб олган. Энг юқори ҳароратлар Ўрта ер денгизи, Шимолий Атлантика океанининг марказий қисми ҳамда Тинч океанининг экваториал ҳудудларида кузатилган. Океанографларга кўра, Жаҳон океани ҳозирда доимий иссиқлик босими остида қолмоқда. Бу ҳолат денгиз экотизимлари, иқлим жараёнлари ва об-ҳаво ўзгаришларига жиддий таъсир кўрсатиши мумкин. Тадқиқотчилар рекорд даражадаги исишни асосан Эл-Нинё иқлим ҳодисаси билан боғламоқда. Ушбу табиий жараён Тинч океанининг марказий ва шарқий қисмида сув ҳароратининг меъёрдан юқори бўлиши билан тавсифланади ва глобал иқлимга сезиларли таъсир кўрсатади.