Давлат хавфсизлик хизмати томонидан Тошкент ва Андижон вилоятларида ўтказилган тезкор тадбирлар давомида пора олиш ҳамда давлат ер майдонини ноқонуний сотишга уриниш билан боғлиқ ҳолатларга чек қўйилди. Тошкент шаҳрида ДХХнинг “Cалл-маркази”га келиб тушган мурожаат асосида ўтказилган тадбирда Кадастр агентлигининг Яшнобод туман бўлими бош инспектори учинчи шахс орқали 2 минг АҚШ доллари олаётган вақтида қўлга олинди.

Аниқланишича, мансабдор шахс маҳаллий фуқаро томонидан ноқонуний ўрнатилган енгил конструкцияли иншоотларни бузмаслик ҳамда унга нисбатан жарима қўлламаслик эвазига ушбу маблағни талаб қилган. Яна бир ҳолат Андижонда қайд этилди. Дастлабки маълумотларга кўра, 1984 йилда туғилган фуқаро Андижон туманидаги давлат захирасида бўлган 40 сотих ер майдонини гўёки “Э-аукцион” орқали қўлга киритганини айтиб, уни кадастр тизимидаги танишлари орқали харидор номига расмийлаштириб беришни ваъда қилган.

У мазкур хизмат эвазига 160 минг АҚШ доллари талаб қилиб, олдиндан 80 минг АҚШ долларини олаётган вақтида ДХХ, Ички ишлар органлари ва Иқтисодий жиноятларга қарши курашиш департаменти ходимлари томонидан ушланди. Ҳар икки ҳолат юзасидан жиноят ишлари қўзғатилган. Ҳозирда тергов ҳаракатлари олиб борилмоқда.