Австралиялик мутахассис Анже Постекоглу Саудия Арабистонининг “Ал-Наср” клуби бош мураббийи этиб тайинланди. Клуб матбуот хизмати маълумотига кўра, томонлар икки мавсумга мўлжалланган шартнома имзолаган. 60 ёшли мураббийнинг сўнгги иш жойи Англиянинг “Ноттингем Форест” клуби бўлиб, у жамоани ўтган йилнинг октябрь ойида тарк этганди.

У “Ал-Наср”да португалиялик мутахассис Жорже Жезушнинг ўрнини эгаллади. Постекоглу фаолияти давомида Австралиянинг “Саут Мельбурн”, “Брисбен Роар” ва “Мельбурн Виктори”, Япониянинг “Йокогама Ф. Маринос”, Шотландиянинг “Селтик” клублари ҳамда Австралия миллий терма жамоасини бошқарган. У “Саут Мельбурн” ва “Брисбен Роар” билан икки марта Австралия чемпиони бўлган. Шунингдек, “Йокогама Ф. Маринос” билан Япония чемпионлиги, “Селтик” билан эса икки марта Шотландия чемпионлиги, мамлакат Кубоги ва Лига кубогини қўлга киритган.

2015 йилда Австралия терма жамоасини Осиё кубоги ғолиблигига ҳам олиб чиққан. 2023–2025 йилларда Англиянинг “Тоттенҳэм” клубини бошқарган Постекоглу унинг раҳбарлигида жамоани 2024/25 йилги UEFA Европа лигаси ғолиблигига етаклади. Бу “шпорлар” учун 2008 йилдан буёнги илк расмий соврин бўлди. Бироқ ўша мавсумда клуб Англия Премьер-лигасини 17-ўринда якунлаган эди. Энди австралиялик мутахассис “Ал-Наср”да жамоа етакчиси Криштиану Роналду билан бирга ишлайди.