Президент Шавкат Мирзиёев раислигида Тошкент шаҳри, хусусан, Сергели туманини ижтимоий-иқтисодий ривожлантириш ҳамда маҳаллаларда хавфсиз муҳит яратиш масалаларига бағишланган видеоселектор йиғилиши бошланди.

Давлатимиз раҳбари сўнгги йилларда Сергели туманида катта ўзгаришлар амалга оширилганини таъкидлади. Яқин-яқингача пойтахтнинг чекка ҳудуди ҳисобланган Сергелида аҳоли ишлаш, даромад топиш, дам олиш ва тиббий хизматлардан фойдаланиш учун асосан шаҳар марказига боришга мажбур эди. Бугунги кунда эса тумандаги муҳит ва одамларнинг яшаш тарзи тубдан ўзгарган, Сергелида ҳаёт қайнамоқда.

Сўнгги ўн йил давомида туманда 30 минг хонадонли янги уй-жойлар, умумий майдони 2 миллион квадрат метр бўлган саноат, савдо ва сервис объектлари барпо этилди. Тадбиркорлар сони 2,5 мингдан 6 минг 200 тага етди. Бюджет тушумлари эса 382 миллиард сўмдан 2 триллион 200 миллиард сўмга, яъни 5,5 баробар ошди.

Шунингдек, аҳоли учун 5 та йирик дам олиш маскани ва истироҳат боғи фойдаланишга топширилди. Тошкент вилоятидан ўтган 13 та маҳалла ҳисобига Сергели тумани ҳудуди 1 минг 800 гектарга кенгайиб, жами 5,6 минг гектарга етди. Сергелини бошқа туманлар ва шаҳар маркази билан боғлайдиган 9 километрлик йўл ҳамда 8 та станциядан иборат янги метро линияси бунёд этилди.

Таълим ва соғлиқни сақлаш соҳасида ҳам салмоқли ишлар амалга оширилди. Мактаб ўринлари 25 мингдан 38,5 мингга, боғча ўринлари 7,5 мингдан 15,5 мингга кўпайтирилди. Туманда 50 та давлат ва хусусий клиника ташкил этилди.

Шу билан бирга, йиғилишда транспорт, йўл, электр энергияси, ичимлик суви ва канализация каби инфратузилма тармоқларини янада яхшилаш бўйича ҳали ечимини кутаётган масалалар мавжудлиги қайд этилди.