Венесуэлада 24 июнь куни содир бўлган кучли зилзилалар оқибатида ҳалок бўлганлар сони 2,5 мингдан ошди. Айни пайтда минглаб одамлар бедарак деб ҳисобланмоқда. Расмий маълумотларга кўра, дастлаб 2 295 нафар қурбон ҳақида хабар берилган бўлса, қутқарув хизматларининг сўнгги ҳисоботига кўра, ҳалок бўлганлар сони қарийб 2 600 нафарга етган. Мухолифат манбалари эса 38 мингдан ортиқ одамнинг тақдири ҳалигача номаълумлигини билдирмоқда.

Президент вазифасини бажарувчи Делси Родригес ҳукумат қутқарув ишларини кеч бошлагани ҳақидаги танқидларни рад этиб, барча куч ва воситалар зилзиладан сўнг дарҳол сафарбар этилганини таъкидлади. Табиий офат вақтида магнитудаси 7,2 ва 7,5 бўлган иккита кучли зилзила қайд этилган. Энг катта зарар Ла-Гуайра штатига тўғри келган бўлиб, юзлаб бинолар вайрон бўлган. Тўққизинчи кунга кирган қидирув-қутқарув ишларида 27 давлатдан келган мутахассислар иштирок этмоқда. Бироқ сўнгги текширувларда вайроналар остида тирик қолганлар аниқланмагани боис, асосий эътибор ҳалок бўлганларнинг жасадларини қидириш ва идентификация қилишга қаратилган.

Мутахассислар қурбонлар сонининг кўплиги суд-тиббиёт тизимига ҳам жиддий юклама юклаганини таъкидламоқда. Ҳукумат эса табиий офатдан жабрланган оилаларга моддий ва ижтимоий ёрдам кўрсатиш ишлари давом этаётганини маълум қилди.