Тошкент ва Тбилиси ҳамкорликни янги босқичга олиб чиқмоқда Ўзбекистон ва Грузия ўртасидаги дипломатик алоқаларда муҳим қадам қўйилмоқда. Икки давлат раҳбарлари музокаралари якунида Грузияда Ўзбекистон элчихонасини очиш бўйича келишувга эришилди. Президент Шавкат Мирзиёев ва Грузия Бош вазири Иракли Кобахидзе иштирокида ўтган музокараларда сиёсий, савдо-иқтисодий, инвестиция, транспорт-транзит, туризм ҳамда маданий-гуманитар йўналишлардаги ҳамкорликни кенгайтириш масалалари муҳокама қилинди.

Давлат раҳбари Грузияга амалга оширилаётган ушбу давлат ташрифи сўнгги йигирма йилдан ортиқ вақт ичида Ўзбекистон Президентининг мамлакатга илк расмий ташрифи эканини таъкидлаб, бу икки томонлама муносабатларни сифат жиҳатидан янги босқичга олиб чиқишини қайд этди. Томонлар ҳукуматлар, парламентлар, ишбилармон доиралар ва маданий-гуманитар алоқаларни янада фаоллаштириш муҳимлигини таъкидлади. Ўтган йили икки давлат ўртасидаги товар айирбошлаш ҳажми 270 миллион долларни ташкил этган бўлса, жорий йил бошидан буён бу кўрсаткич 100 миллион доллардан ошди. Музокаралар якунида яқин йилларда ўзаро савдо ҳажмини 1 миллиард долларга етказиш, экспорт-импорт мувозанатини яхшилаш ҳамда транспорт-транзит йўналишларидаги ҳамкорликни кучайтириш бўйича қўшма “йўл харитаси”ни ишлаб чиқишга келишиб олинди.