Россияда кузатилаётган бензин тақчиллиги Марказий Осиё давлатлари ёқилғи бозорига ҳам таъсир кўрсата бошлади. Россиядан импорт қилинадиган нефть маҳсулотларига қарам мамлакатлар эҳтимолий узилишларнинг олдини олиш учун қўшимча чораларни ишга солмоқда. Қирғизистон Энергетика вазирлиги маълумотига кўра, мамлакат ички бозорда ёқилғи барқарорлигини сақлаш мақсадида Қозоғистон, Озарбайжон ва Туркманистондан қўшимча бензин етказиб беришни сўраган.

Ўзбекистонда эса АИ-92 маркали бензиннинг улгуржи нархи июнь ойи бошидан буён 11,8 фоизга ошиб, бир тоннаси 13,9 миллион сўмга етди. Шу билан бирга, биржа савдоларида кунлик бензин таклифи қарийб икки баробарга камайгани қайд этилди. Мутахассислар тақчилликни Россиядаги нефтни қайта ишлаш заводлари фаолиятидаги узилишлар билан изоҳламоқда. Ушбу узилишлар Украина дронлари ҳужумлари ортидан юзага келгани айтилмоқда. Вазият сабаб Россия 1 апрелдан бензин экспортига вақтинчалик чеклов жорий қилган, бироқ ҳукуматлараро битимлар асосидаги етказиб беришлар бундан мустасно қолдирилган.

Ёқилғи бозоридаги вазият фонида Қозоғистон ҳам ички эҳтиёжни таъминлаш мақсадида айрим нефть маҳсулотларини темир йўл орқали экспорт қилишни чеклади ҳамда чегараларда назоратни кучайтирди. Таҳлилчиларга кўра, Россиядаги таъминот билан боғлиқ муаммолар давом этса, Марказий Осиёда ёқилғи нархлари ва таъминот занжирларига босим янада кучайиши мумкин.