“Сеул суди Юн Сок Ёлни декабрь ойида қисқа муддатли ҳарбий ҳолат жорий этгани билан боғлиқ айбловлар асосида иккинчи бор ҳибсга олиш тўғрисида ордер чиқарди”, – дея ёзмоқда Yonhap.

Собиқ президент биринчи бор жорий йилнинг январь ойида ҳибсга олинган, бироқ март ойида озод қилинган эди. Сиёсатчи 2024 йил декабрь ойида мухолифатга қаршилик мақсадида бир неча соат давом этган ҳарбий ҳолат эълон қилгани сабабли қўзғолон уюштиришга уринишда айбланмоқда.

Янги суд мажлиси 9 июль куни бўлиб ўтди. Унда Юн Сок Ёлга қарши қўшимча айбловлар илгари сурилган, хусусан, ваколатни суиистеъмол қилиш, мансабдорлар фаолиятига тўсқинлик қилиш ва расмий ҳужжатларни сохталаштириш шулар жумласидан. Суд махсус прокурорнинг “собиқ президент эркинликда далилларни йўқ қилиши мумкин” деган даъвосини қаноатлантирган.

“Собиқ давлат раҳбари тергов ҳибсхонасига жойлаштирилган. Унинг адвокатлари ҳибсга олиш ҳақидаги сўровни “ортиқча ва асоссиз” деб баҳолаган. Агар Юнга янги айбловлар қўйилса, дастлабки суд қароригача у олти ой давомида ҳибсда қолиши мумкин”, - дея хабар бермоқда Yonhap.

Юн Сок Ёл ўтган йилнинг декабрь ойида мамлакатда ҳарбий ҳолат жорий қилишга уринган. Шундан сўнг, парламент уни қўзғолонга уринишда айблаб, импичмент эълон қилган эди.

• Janubiy Koreya
• Президент