Россия ташқи ишлар вазири Сергей Лавров матбуот анжумани вақтида унга халақит берган журналистга танбеҳ берди.

Лавров гапиришни бошлаган пайтда журналист телефонидаги таржима овозини баланд қилиб юборган. Вазир бир неча сонияга жим қолиб, инглиз тилида: “Хонани тарк эта оласизми? Ким шовқин чиқаряпти: сизми ёки телефонингизми?”, – деб сўраган.

Бироқ бу ёрдам бермади. Телефон овози яна зални тўлдирди. Шундан сўнг Лавров журналистга яна мурожаат қилиб: “Ташқарига чиқа оласизми? Мен ҳазиллашмаяпман”, – деди. Кейин эса қўриқчиларига қараб: “Йигитлар, уни бу ердан олиб чиқинглар. Агар телефонингизни бермасангиз, улар қуролини чиқаради”, – деган Лавров.

Кейинроқ Россия ТИВ расмийси Мария Захарова ҳеч ким залдан чиқарилмаганини маълум қилди. Унинг айтишича, операторга телефон овозини пасайтириш бўйича икки марта илтимос қилинган ва ундан қурилмани матбуот анжумани тугагунча бир четга қўйиш сўралган. Шундан сўнг тадбир одатдагидек давом этган.

Лавров айни пайтда уч кунлик ташриф билан Ню-Деҳлида бўлиб турибди. У BRICS тадбирларида қатнашиб, Ҳиндистон, Таиланд, Миср, Эрон ва Малайзия вакиллари билан музокаралар ўтказган.

• Ҳиндистон
• Россия
• Sergey Lavrov
• jurnalist
• саммит