Афғонистоннинг Мозори-Шариф шаҳрида “Ҳайратон — Мозори-Шариф” темирйўл линиясидаги 5-сонли қуруқлик порти фойдаланишга топширилди. Қурилиш ва тиклаш ишлари якунланган мазкур портга илк поезд таркиби ҳам қабул қилиниб, юк тушириш ишлари бошланди.

“Ўзбекистон темир йўллари” раҳбари З.Г. Нарзуллаев Афғонистон бош вазири ўринбосари Мулла Абдулғани Бародар билан музокаралар ўтказди. Унда темирйўл линияси ўтказувчанлик имкониятларини ошириш масалалари муҳокама қилинди.

Томонлар Наибобод станциясида қўшимча 1650 метрлик тармоқ қуриш орқали юк вагонларини қайта ишлаш ҳажмини ошириш ва уларнинг туриб қолиш вақтини қисқартиришга келишиб олди.

Афғонистон томони юк оқимини кўпайтириш ҳамда поездларни узлуксиз қабул қилишга тайёр эканини билдирган.