Дания ишлаб чиқарувчиси Bavarian Nordic A/S компаниясининг MVA-BN вакцинаси Жаҳон соғлиқни сақлаш ташкилотининг дастлабки квалификациясидан ўтди ва маймунчечакка қарши биринчи дори бўлди. Бу ҳақда ЖССТ сайти маълум қилди.

Унга кўра, MVA-BN вакцинаси 18 ёшдан ошган одамларга тўрт ҳафталик интервал билан икки дозада инъекция сифатида берилиши мумкин.

Аниқланишича, MVA-BN’нинг инфекция манбаси билан контактдан олдинги бир марталик дозаси маймунчечакдан ҳимоя қилишда 76 фоиз самарадорликни, икки дозада эса тахминий самарадорлик 82 фоизга етишини кўрсатади.

Шунингдек, ЖССТ раҳбари Тедрос Адҳаном Гебреесус ҳам вакцина бўйича ўз фикрларини билдирган.

“Маймунчечакка қарши вакцинанинг дастлабки квалификацияси Африкадаги ҳозирги эпидемиялар шароитида ҳам, келажакда ҳам ушбу касалликка қарши курашимиздаги муҳим қадамдир. 

Биз ҳозир зудлик билан бу вакциналар энг зарур бўлган жойларда адолатли тақсимотни таъминлаш учун вакциналарни харид қилиш, хайрия ва фойдаланиш масштабини кенгайтиришимиз керак”.

• ЖССТ
• Маймун чечаги