Уй шароитида муздаккина, мазали ҳамда фойдали торт тайёрлаб, оила аъзоларингизга тортиқ этинг ва уларни хурсанд қилинг.

Керакли масаллиқлар:

- Творог — 220 гр.

- Сметана — 250гр.

- Сув — 130 мл.

- Шакар — 80 гр.

- Желатин — 18 гр.

- Ванилин — 1 ош қ.

- Апелсин — 1 дона.

- Киви — 1 дона.

Тайёрланиш жараёни:

1. Керакли масаллиқларни олдиндан тайёрлаб оласиз. Сметананинг ёғлилик даражаси муҳим эмас, аммо творогнинг ёғлилик даражаси 5-9% бўлиши талаб этилади. Меваларни ҳам ўз ихтиёрингизга кўра танлашингиз мумкин.

2. Творог, сметана, ванилин ва шакарни блендер ёрдамида аралаштириб оласиз.

3. Желатинга қайнатиб совутилган сув солиб, 15 дақиқага қолдирасиз.

4. Исталган шаклдаги қолипни танлаб, селофан пакет билан қоплайсиз. Шунда музлаган тортни ажратиб олишингиз осон кечади.

5. Меваларни пўстлоғидан ажратиб, кесиб оласиз ва қолипга териб чиқасиз.

6. Желатинни суюқ ҳолга келгунига қадар паст оловда эритиб оласиз ва тайёр аралашмага қўшасиз.

7. Ҳосил бўлган аралашмани қолипга қуйиб, устини селофан билан ёпасиз ва 2-3 соатга музлатгичда қолдирасиз.

8. Музлаган торт устидан тарелка ёпиб, уни тўнкарасиз ва селофан пакетни олиб ташлайсиз.

Хамир ва газ печисиз тайёрланган мазали торт тайёр!

Ёқимли иштаҳа!

• Фойдали
• Рецепт
• қизиқарли