Хорватия миллий терма жамоаси афсонаси Лука Модрич миллий жамоадаги фаолиятини расман якунлади. Бу ҳақда футбол инсайдери Фабритсио Романо маълум қилди. Жаҳон чемпионати 1/16 финалидаги Португалия — Хорватия учрашувидан сўнг Криштиану Роналду майдонда Модрич олдига бориб, унга ҳурмат бажо келтирди. “Ўйин тугагач, Криштиану Роналду Лука Модричнинг олдига бориб, унга ҳурмат бажо келтирди. Бу Модричнинг миллий терма жамоадаги сўнгги учрашуви эди. Икки футбол афсонаси. Ҳурмат”, — деб ёзди Фабритсио Романо. Торонтодаги БМО Фиэлд стадионида ўтган баҳсда Португалия 2:1 ҳисобида ғалаба қозонди. Модрич учрашувни тўлиқ ўтказган бўлса, Роналду 68-дақиқада пеналтидан гол урди.

Лука Модрич Хорватия терма жамоасидаги дебютини 2006 йилнинг март ойида ўтказган. У миллий жамоа тарихида энг кўп ўйин ўтказган футболчи сифатида фаолиятини якунлади. Афсонавий ярим ҳимоячи Хорватия сафида 200 та ўйин ўтказиб, 27 та гол ва 29 та голли узатма муаллифи бўлди. Шунингдек, у миллий терма жамоа сафида 200 та ўйин ўтказган жаҳон футболи тарихидаги тўртинчи футболчига айланди. Ундан аввал бу натижага Криштиану Роналду, Лионел Месси ва Бадер Ал-Мутва эришган эди.