Президент Шавкат Мирзиёев раислигида ўтказилган видеоселектор йиғилишида Сергели ва Янгиҳаёт туманлари аҳолисини узоқ йиллардан буён қийнаб келаётган бадбўй ҳид муаммоси муҳокама қилинди. Масъулларга 1-сентабргача оқова сув қабул қилиш иншоотига замонавий филтрлаш ускуналарини ўрнатиб, ноқулай ҳидни бартараф этиш бўйича топшириқ берилди.

Йиғилишда ушбу муаммони тизимли ҳал этиш мақсадида келгуси йилдан Қуйи Чирчиқ туманида қуввати 300 минг куб метр бўлган замонавий сув тозалаш иншооти қурилиши бошланиши ҳам маълум қилинди. Бу Сергелидаги мавжуд иншоот юкламасини сезиларли даражада камайтиради.

Шунингдек, туманда транспорт инфратузилмасини яхшилаш ишлари ҳам давом эттирилади. Режага кўра, 23 километр асосий йўл қайта қурилиб, 455 та “ақлли” светофор, 150 та замонавий автобус бекати ҳамда 10 минг ўринли автотураргоҳ барпо этилади.