Кеча, 4 июль куни Россия Президенти Владимир Путин ва АҚШ Президенти Доналд Трамп телефон орқали мулоқот қилди. Кремл маълумотига кўра, суҳбат 1 соат 25 дақиқа давом этган. Қайд этилишича, мулоқот давомида Украинадаги вазият, Эрон атрофидаги ҳолат ҳамда Россия–АҚШ муносабатларининг истиқболлари муҳокама қилинган. Шунингдек, томонлар яқин вақтда яна телефон орқали мулоқот қилишга тайёр эканини билдирган. Кремл ёрдамчиси Юрий Ушаковнинг маълум қилишича, қўнғироқ ташаббуси Вашингтон томонидан билдирилган.

Унинг айтишича, Доналд Трамп Украинадаги ҳарбий ҳаракатларни тезроқ тўхтатиш ва можарони дипломатик йўл билан ҳал этиш бўйича саъй-ҳаракатларни қўллаб-қувватлашини яна бир бор таъкидлаган. Россия томони эса можарони сиёсий-дипломатик йўл билан ҳал қилиш тарафдори эканини, бунда ўзининг принсипиал ёндашувлари ҳисобга олиниши лозимлигини билдирган. Шунингдек, суҳбат чоғида икки давлат ўртасидаги иқтисодий ва ҳарбий-сиёсий алоқаларни ривожлантириш истиқболлари ҳам муҳокама қилинган. Кремл баёнотига кўра, мулоқот конструктив ва амалий руҳда ўтган.