Лионель Месси, Криштиану Роналду ва Неймар “Forbes” талқинига кўра 2022 йилнинг энг кўп маош олувчи спортчилари ўнталигига кирди.

Лео Месси майдонда ақл бовар қилмаc мавсум ўтказди ва ушбу муваффақиятининг самарасини кўрмоқда. “Forbes” маълумотларига кўра, ўтган йили айнан Лео энг кўп даромад олган спортчи бўлди. Аргентиналик футболчи 108 миллион фунт стерлинг билан баскетбол афсонаси Леброн Жеймсни ортда қолдирди.

ПСЖ сафида Месси ҳафтасига 1,2 миллион евро маош олади ва “Adidas”, “Budweiser”, “PepsiCo” va “Hard Rock International” билан шартнома итмзолаган. Аргентиналик футболчи майдондан ташқарида 45 миллион евро ишлаб топган.

Леонинг азалий рақиби Криштиану Роналду фаолиятидаги энг қийин даврни бошдан кечирмоқда. Ўтган мавсум якунида “Манчестер Юнайтед” Чемпионлар лигасига чиқа олмаганидан кейин унинг маоши қисқартирилди ва клуб бу мавсумда у билан тузилган шартномани бекор қилди.

2022 йилда маоши камайгани ва спортда муваффақият қозона олмаганига қарамай, Криштиану Роналду 96 миллион фунт стерлинг ишлаб топди. “Nike”, “Herbalife” ва “Clear Shampoo” билан ҳомийлик шартномалари, шунингдек, унинг Instagram’даги реклама нархи унга майдондан ташқарида 46 миллион фунт ишлаб топишга ёрдам берди. Бироқ португалиялик юлдуз 2023 йилда энг кўп пул ишлаб топган спортчи бўлиши ҳозирданоқ аниқ. Чунки 37 ёшли футболчи Саудиянинг “Ал-Наср” клубида йилига 200 млн евро маош олади.

Ўтган йили таниқли баскетбол юлдузи Леброн Жеймс 101 миллион фунт, Неймар 79 миллион фунт ва бошқа бир баскетбол юлдузи Стивен Карри 77 миллион фунт стерлинг ишлаб олди, Лео ва Криштиану билан биргаликда улар “Forbes”нинг топ-бешлигидан ўрин олди.

Баскетболчи Кевин Дьюрант (77 миллион фунт), теннис афсонаси Рожер Федерер (75 миллион фунт), мексикалик боксчи Канело Альварес (75 миллион фунт), америкача футбол рамзи – Том Брейди (70 миллион фунт) ва грециялик баскетболчи Яннис Адетокумбо (67 миллион фунт) кучли ўнликда қайд этилган.

• Daromad
• Forbes
• Месси
• Неймар
• Роналду