Мўйноқ тумани Қорақалпоғистон марказидан қарийб 300 километр олисда жойлашган. Ҳудудда аҳоли нисбатан кам бўлса-да, уларга тиббий ёрдам кўрсатишда доим тор соҳа мутахассисларига эҳтиёж юқори.

Шу сабабли 2022 йил 17 майда имзоланган “Тиббиёт муассасалари ходимларини моддий қўллаб-қувватлаш ҳамда рағбатлантиришни кучайтириш чора-тадбирлари тўғрисида”ги Президент Фармонида бошқа ҳудудлардан Тахтакўпир, Чимбой, Қораўзак, Бўзатов, Шуманай, Қўнғирот туманларига бориб ишловчи шифокорларнинг ҳар ойлик лавозим маошига 100 фоиз, Мўйноқ туманида эса 200 фоиз миқдорида қўшимча устама тўловлари тўлаб бериш белгиланган.

Мўйноқда 6 та даволаш-профилактика муассасаси ва 2 та маҳалла тиббиёт пункти фаолият кўрсатади. Уларда ишлайдиган соҳа ходимлари сони 511 нафар бўлиб, 59 нафари шифокорлардир. Ана шу мутахассислар орасида Президент фармони асосида бошқа ҳудудлардан келиб ишлаётган врачлар 12 нафарни ташкил қилмоқда”, – дейди туман тиббиёт бирлашмаси бошлиғи ўринбосари Жамила Давлетова.

Қайд этилишича, Мўйноқда республикага қўшни Хоразм вилоятидан тортиб, Самарқанд, Тошкент, Фарғона ва Андижон вилоятларидан келиб ишлаётган шифокорлар ҳам бор.

Бошқа ҳудуддан келиб ишлаётганлар орасида педиатр, анестезиолог-реаниматолог, отоларинголог, хирург, уролог ва терапевт каби мутахассисликларга эга шифокорлар бўлиб, улар мўйноқликларга сифатли тиббий хизмат кўрсатишда маҳаллий шифокорларга кўмак бермоқда.

• Mo'ynoq
• Қорақалпоғистон
• Тиббиёт