Сассекс герсогиняси Меган Маркл 2025-йилда отаси Томас Марклга мактуб ёзиб, унинг фарзандлари билан учрашишига рухсат бермаслигини ва у билан бошқа алоқа қилмаслигини билдирган. Бу ҳақда ББC хабар берди.

Хабарга кўра, мактуб Томас Маркл Филиппинда оёғи ампутатсия қилинганидан кейин шифохонада даволанаётган пайтда юборилган. Унда Меган отасига нисбатан вояга етмаганларга жинсий зўравонлик қилиш ҳақидаги даъволардан хабардор эканини билдирган.

Аввалроқ Томас Марклнинг Филиппиндаги собиқ уйидан болаларга нисбатан жинсий зўравонликка оид материаллар топилгани ҳақида хабарлар тарқалган эди. Унинг ўғли, Меган Марклнинг ўгай укаси кичик Томас Маркл, отасининг буюмлари орасидан шундай тасвирлар ва видеолар топганини айтиб, бу ҳақда АҚШ Федерал қидирув бюросига (ФҚБ) мурожаат қилган.

ФҚБ мазкур даъволардан хабардор эканини тасдиқлаган. Филиппин расмийлари ҳам ҳолат юзасидан текширув бошлаган. Мамлакат ички ишлар вазири Жонвик Ремуланинг маълум қилишича, политсия Томас Марклнинг компютерини олиб қўйган ва унда рақамли экспертиза ўтказилиши режалаштирилган.

Томас Маркл эса ўзига қўйилаётган айбловларни рад этмоқда. У Маил он Сундай нашрига берган интервюсида Филиппинга аввалги сафарлари давомида жинсий хизматлар учун пул тўлаганини тан олган, бироқ вояга етмаганлар билан жинсий алоқада бўлганини ҳамда болаларга нисбатан жинсий зўравонлик акс этган материалларга эгалик қилганини инкор этган.

Меган Маркл 23-октябрь куни эълон қилган баёнотида отаси билан муносабатлари деярли бутунлай узилганига изоҳ бериб, эҳтимолий жабрланган болалар ҳақида қайғураётганини билдирган. Шунингдек, у нима сабабдан отасига фарзандлари билан мулоқот қилишга рухсат бермаганини одамлар тушунишини исташини айтган.

Лондон политсияси 2019-йилда Томас Марклга оид бир қатор даъволар акс этган мактубни олганини тасдиқлаган. Ўша вақтда мактуб ҳақида Меган Маркл ва шаҳзода Гаррига маълумот берилган. Ҳозирда политсия ушбу ҳолатга доир аввалги ҳаракатларини қайта кўриб чиқмоқда.

Меган Маркл ва отаси ўртасидаги муносабатлар 2018-йилда, унинг шаҳзода Гарри билан тўйидан олдин ёмонлашган. Томас Маркл соғлиғи билан боғлиқ муаммолар сабаб тўйда қатнашмаган. Кейинчалик у бир неча марта инсултни бошдан кечирганидан сўнг Филиппинга кўчиб ўтган.

Ҳозирда Томас Марклга нисбатан билдирилган даъволар юзасидан текширув давом этмоқда, унинг ўзи эса айбловларни рад этмоқда.