Испаниянинг Барселона шаҳри яқинида автобуснинг тахминан 20 метр чуқурликдаги жарликка қулаши оқибатида 83 киши жароҳатланди. Ҳодиса 2026-йил 25-октябрь куни Каталониянинг Фогарс-де-Монклюс ҳудудида содир бўлган. Бу ҳақда Ассоcиатед Пресс хабар берди.

Маълумотларга кўра, автобус тор ва бурилишлари кўп бўлган йўлдан чиқиб кетиб, жарликка қулаган. Жароҳатланганларнинг етти нафари оғир, 18 нафари ўртача даражада, 58 нафари эса енгил тан жароҳатлари олган.

Ҳодиса жойига 23 та тез ёрдам машинаси ва иккита тиббий вертолёт юборилган. Қутқарувчилар, тиббиёт ходимлари ҳамда психологик ёрдам гуруҳлари ҳам воқеа жойида иш олиб борган.

Каталония ҳукумати соғлиқни сақлаш вазири Олга Пане қутқарувчилар ҳодиса жойи ва унинг атрофини текшириб, бошқа жабрланганлар бор-йўқлигини аниқлаётганини билдирган. Қидирув ишларига тоғ-қутқарув бўлинмалари ҳам жалб қилинган.

Ҳозирча автобуснинг йўлдан чиқиб кетиш сабаби маълум эмас. Ҳодиса юзасидан текширув олиб борилмоқда.