Президент Шавкат Мирзиёев тиббиётни рақамлаштириш ишлари хусусий клиникалар ва дорихоналарни ҳам қамраб олаётганини маълум қилди. Давлат раҳбарининг айтишича, яқин вақт ичида тизим сунъий интеллект имкониятлари билан бойитилиб, шифокор ва ҳамширалар фаолиятини қўллаб-қувватлашга хизмат қилади.

“Яқинда бу тизимни сунъий интеллект имкониятлари билан янада бойитиб, шифокор ва ҳамшираларнинг ҳақиқий кўмакчисига айлантирамиз”, — деди президент.

Учрашувда фарматсевтика соҳасини ривожлантириш масалаларига ҳам тўхталиб ўтилди. Мамлакатда фарматсевтика маҳсулотларига бўлган эҳтиёжнинг 70 фоизини ички ишлаб чиқариш ҳисобидан қоплаш мақсад қилинган. Шу йўналишда сўнгги йилларда 1 миллиард долларлик 330 та янги ишлаб чиқариш қуввати ишга туширилган.

Шунингдек, “Тошкент биофарм сити” кластери ҳамда Андижон, Наманган, Жиззах ва Тошкент вилоятларида фарматсевтика эркин иқтисодий зоналари ташкил этилган. Ушбу ҳудудларда умумий қиймати 1,2 миллиард долларлик лойиҳалар амалга оширилмоқда.