Қўмитанинг хабар беришича, вилоятда Қизамиқ касаллиги билан гумон қилинган беморларни стационар даволаш учун 340 шифо ўрин ташкил этилган, бундан 240 ўрин вилоят юқумли касалликлар шифохонасига, 100 шифо ўрин вилоятнинг Бешкапа болалар сиҳатгоҳига тўғри келади.

Вилоят юқумли касалликлар шифохонасидаги жами 240 ўриндан 235 ўрин банд, 5 шифо-ўрни захираси мавжуд. Бешкапа болалар сиҳатгоҳида ажратилган 100 ўринда 2 ёшдан юқори беморларнинг 20 нафари даволанмоқда, 80 шифо-ўрни захираси мавжуд.

Ҳозирги кунда, вилоятда жами 85 шифо-ўрни захираси бор, дейилади баёнотда. Шунингдек, 285 та бемордан 62 фоизи 1 ёшгача болалар, 25 фоизи 1-3 ёшгача бўлган болаларни ташкил қилади. Бугунги кунда вилоятда диагностикум, реагент ва бошқа вакциналарнинг етарли миқдорда захираси мавжудлиги айтилган.

Вилоятга 9500 доза қизамиқ-қизилча вакцинаси берилган бўлиб, жами 1936 нафар болалар эпидемиологик кўрсатма асосида қизамиқ касаллигига қарши вакцина билан эмланган. Ҳозирда даволаш профилактика муассасаларининг эмлаш хоналарида 310 доза қизамиқ-қизилча вакцинаси захираси мавжуд. 2023 йилнинг 10 ойи давомида вилоят бўйича жами 735 та қизамиқ касаллиги лаборатория текширувида тасдиқланган.

Маълумот ўрнида шуни алоҳида таъкидлаш лозимки, жорий йилнинг ноябрь ойида Ўзбекистон Республикаси давлат бюджети ҳисобидан 3 млн. доза қизамиққа қарши вакциналар харид қилинган эди. Ушбу вакциналар эпид кўрсатма бўйича эмланадиган қатлам, маълум сабабларга кўра эмлашдан қолиб кетган болалар ҳамда хавф гуруҳига кирувчи, қизамиқ касали бўлган бемор билан мулоқотда бўлган 6 ойдан 5 ёшгача бўлган болаларни эмлаш учун мўлжалланган ва айни вақтда ҳудудларга тарқатилмоқда.

• Emlash
• Касаллик
• Вакцина